بخصوص فصل الرّبيع

[Rawad]

تنويه: رواد من زمان زبون منتديات إلحادية، ولكن كنت بالغيبة الكبرى وهلأ جايي الموضوع ع صحوة مفاجئة… من علامات الظهور يمكن شو بيعرفني..

وها نحنُ اليوم في الشّتاء الخامس بعد الألف للربيع العربي المظفّر، وكل شي حكيت عنو وتوقعتو ببداية هالربيع العطر صار أمر واقع اليوم، وصلنا لمرحلة داعش، يعني قطعنا أفغانستان بشي تلات أشواط…
والأنظمة اللي كانت سيئة صارت أسوأ، أو صارت كذا أسوأ، يعني كان في أسود بالحكم بشي محل مثلا، هلأ صار في حديقة حيوانات، من الأسود للضباع للدببة الروسية وغير الروسيّة (والدببة الطائرة) للجمال وحتى الكوالا، والبغال، قول البغال من الأول موجودين بس كانوش ظاهرين بهالوضوح، أو بهالبغلنة يمكن..
أنا مش كتير زعلان من الإسلاميين، يا أخي الإسلاميين من الأول هيك، يعني الرّجعية والذكورية والقصص هول بيتلخصوا كلّن بالشرائع الإسلامية، الدبح والتفجير وبتر الأطراف مشهد عادي بالتّاريخ الإسلامي والسعودية، ولو ما كنا شايفينو لايف بالتاريخ، ولا شايفينو بهالفجاجة بالسعودية، بس منعرف إنو الإسلاميين من أيام محمد بن عبدالله هني هني، لا راحوا ولا إجو..
أنا زعلان من الملحدين والعلمانيين والليبراليين والشيوعيين الأمركان وجماعة الحريّة والديمقراطيّة، إنّو بعد ما انتبهوا إنو طز عهالثورات؟
ما استنتجوا إنو في مشاريع وأجندات شر*وطة هي اللي عم تحرّك الأحداث مش ثورات عفوية لشعب مسالم، بعد ما انتبهوا إنو هالشعب مش مسالم بنوب؟؟
وإنو كان بدو بس فرصة ليطلّع عقدو وإجرامو وأمراضو وعاهاتو المستديمة وغير المستديمة؟؟
معقول بعد في ناس مثلا مآمنين إنو الثورة السورية ثورة مش حرب أهليّة؟
وإنو بعد ما تخلص الأحداث إذا الله عيشنا راح تصير سوريا واحة الديمقراطية والحريّة والتّعدد واللحم بعجين؟؟
بعد في ناس بيعتبرو إنو نظام حسني مبارك سقط؟؟
وانو ليبيا صارت حرة ومستقرّة وتتجه لتكون دولة عظمى؟
وانو تونس صارت أحسن بعد السّورة؟
بعد في ناس بيعتبرو انو اللي عم يصير باليمن صراع بلوريتاريا وبرجوازية؟
وإنو بالبحرين فشلت الثّورة لأنه مش جماهيرية ولأنها طائفية؟
بعد في ناس بيعتبرو إنو في دولة كاملة السيادة إسمها العراق ودولة موحّدة ذات شعب واحد إسمها سوريا، وإنو الحراك اللبناني ضد الزّبالة إرهاصات ثورة شاملة عابرة للقارات متل ثورة الأرُز (ركّز عالضمّة) المجيدة؟؟
المشكلة يا عزيزيني وعزيزاتي انو من زمان نحنا مأخّرين بقراءة الأحداث، وهيدا هو السّبب الجوهري اللي خلّا اوروبا تشطحنا بخمسين سنة ضوئية فضلا عن المقارنة مع اليابان واميركا وادّول الإستعمارية الشقيقة الأخرى، نحنا متل اللي بيحضروه المسرحيّة ستمية مرة وبالمرة الستميّة وواحد بيسألوه كيف بتنتهي هالمسرحية؟؟
بيجاوب بعفويّة أنا ما خصني اسأل الممثلين..

[Tsuki]

الموضوع مهم لكن لما هو في قسم النقد الساخر؟ ‘ لا اظن ان هذا اللفظ كان له اهمية.

[Rawad]

شكرا لك
ما حسيتو خرج الساحة السياسية لأنّو خفيف وبالعاميّة وفيه سخرية باردة.